Mostrando entradas con la etiqueta crónica. Mostrar todas las entradas
Mostrando entradas con la etiqueta crónica. Mostrar todas las entradas

lunes, 18 de marzo de 2013

Deportivo 3 - 1 Celta (A Crónica)

Oubiña, Valerón e De Lucas | Foto: Cabalar (EFE)
Dolorosa derrota a sufrida á noite do venres, xa de por si dura, por tratarse do eterno rival, pero tamén polas circunstancias acontecidas antes, durante e despois do partido.

Iago Aspas foi expulsado no minuto 28, cando xa perdían os celestes por un gol a cero e, con seguridade esta temprana ausencia pasoulle factura ós nosos. Aínda que, sen as ideas claras, non se lles pode reprochar ós xogadores do Celta que non desen a cara, mesmo cando xa perdían por tres goles.

Queremos pasar páxina desde Preferencia Celeste e pensar nos vindeiros partidos, nos que o Celta se xoga a vida, pero ten tódalas posibilidades de salvación, por mor dos bos resultados (para os nosos intereses) producidos polos equipos que están na parte baixa do taboleiro clasificatorio.

Membros da peña en Riazor | Foto: Preferencia Celeste
O Celta segue penúltimo, con 23 puntos, pero segue a tres puntos da salvación (que marca o Real Zaragoza, 17º, con 26 puntos, quen tamén perdeu esta fin de semana).

Agora, cunha semana de descanso, por mor dos partidos internacionais, agarda a visita do FC Barcelona, o sábado 30 (18:00 horas) no que Balaídos presentará unha inmellorable entrada, pois xa se vendeu todo o papel para este encontro.

Lembrade que #XuntosConseguirémolo

Ficha do partido:

3-RC Deportivo: Aranzubia, Silvio, Marchena, Aythami, Manuel Pablo, Abel Aguilar, Juan Domínguez, Bruno, Pizzi, Valerón (Bergantiños, min. 85) e Riki (Salomao, min. 76).

1-RC Celta: Varas, Jonny, Túñez, Demidov, Roberto Lago, Oubiña, Pranjic, Augusto (Krohn-Dehli, min. 79), De Lucas (Orellana, min. 55), Bermejo (Park min. 68) e Aspas.

Goles:
  • 1-0: Minuto 8. Riki, recolle un centro libre de marca, e sen deixar caer o balón bate a Varas a pracer.
  • 2-0: Minuto 63. Silvio, recolle un balón rexeitado a uns 20 metros e lanza un trallazo que bate a Varas pola escuadra. Gol de belísima factura.
  • 3-0: Minuto 78. Salomâo á contra, bate a Varas pola esquerda do porteiro.
  • 3-1: Minuto 79. Park remata tras un magnífico pase de Krohn-Delhi.

Árbitro: Velasco Carballo, do colexio madrileño. Amonestou a Túñez, Demidov, Kronh-Delhi (polo Celta), Aythami e Pizzi (do Deportivo). Expulsou con vermello directo a Iago Aspas (Celta).

Incidencias: Partido correspondente á xornada 28 da Liga BBVA, disputado no Estadio Municipal de Riazor de A Coruña, casi cheo, uns 33.000 espectadores, dos que uns 1.000 eran siareiros do Celta.

domingo, 10 de marzo de 2013

Celta 1 - 2 Real Madrid (A Crónica)

Ronaldo (esq.) a piques de tirar o penalti | Foto: Tomás Rodríguez
Derrota digna dun grande Celta, ante outro grande, como é o Real Madrid, por un gol a dous. O Celta que se viu neste serán non reflicte a súa clasificación na táboa clasificatoria, non alivia a situación dramática no tramo final de Liga, pero permite afrontar o derbi galego do vindeiro venres con optimismo.

Empezou o Celta moi metido no encontro. Proba deste dominio dos vigueses foi o feito de que o Real Madrid non tirou entre os tres paos hasta pasado o minuto 21 de partido.

Diego López, un dos destacados do Real Madrid, fixo tres intervencións moi meritorias nos primeiros minutos a tiros de Iago Aspas, en dúas ocasións, e de Álex López.

Pasados os minutos, o Real Madrid foi achegándose cada vez con máis perigo á área do Celta, con intervencións providenciais de Javi Varas, un dos mellores dos vigueses. Dous balóns de Benzemá, outro de Marcelo e outro de Callejón. Só un tiro de Cristiano Ronaldo pegou no largueiro. O tramo final do primeiro tempo foi de dominio dos brancos.

No inicio do segundo tempo, seguiu o dominio do Real Madrid. E así, no 61, chegaría o primeiro do Real Madrid, Ronaldo anotou tras un rexeite de Varas que aproveitou ben o dianteiro portugués. Os vigueses protestaron un posible fora de xogo.

Non se achicou o Celta e, dous minutos despois, gran xogada de estratexia dos celestes, centro ó área que recolle Aspas e remata á reviravolta tropezando o coiro en Pepe para rematar ó fondo das mallas.

Minutos despois, xogada desafortunada de Varas que sae cos pes diante de Kaká, derrubando ó xogador do Real Madrid e o árbitro pitou a pena máxima, mostrándolle o cartón amarelo ó meta sevillano do Celta. Ronaldo tirou desde os once metros facendo o segundo para o Real Madrid.

O Celta seguiu batallando o a partido convertiuse nun constante ida e volta no que calquera dos dous equipos poido ter anotado algún gol mais para os seus. Park, quen saiu nos derradeiros minutos de partido, tivo a súa no último minuto, cando estrelou no pao un centro de Pranjic.

Non poido ser, pero os vigueses deixaron bo sabor de boca e a esperanza de que xogando así, pódese conseguir a salvación en Primeira. Os vigueses son penúltimos, con 23 puntos, a só dous puntos do Zaragoza que ocupa agora o posto 17. Mentres, os madrileños agora son segundos, con 58 (trala derrota do At. Madrid esta noite).

FICHA TÉCNICA 

1-R.C. Celta: Javi Varas, Jonny, Demidov, Cabral, Roberto Lago, Oubiña, Álex López (Pranjic, min.55), Augusto, De Lucas (Mario Bermejo, min. 60), Krohn-Dehli (Park, min. 85) e Iago Aspas

2-R. Madrid: Diego López, Essien, Pepe, Albiol, Marcelo, Khedira (Alonso, min.46), Callejón (Kaká, min. 65), Modric, Ozil, Cristiano e Benzama (Higuaín, min. 65)

Goles: 0-1, min .61: Ronaldo; 1-1. min.63: Iago Aspas; 1-2, min.70: Ronaldo (de penalti).

Árbitro: Estrada Fernández, do comité catalán. Mostrou cartóns amarelos a De Lucas e Javi Varas, polo Celta, e a Albiol, polo Real Madrid.

Incidencias: Partido disputado no Estadio Municipal de Balaídos, ante 25.344 espectadores nunha tarde noite algo fría e na que choveu intensamente nos últimos minutos de partido.

lunes, 4 de marzo de 2013

Sevilla 4 - 1 Celta (A Crónica)

Aspas fronte a Beto | Foto Paco Puentes (EFE)
Severa derrota do Celta diante do Sevilla no Sánchez Pizjuán da capital andaluza, por catro goles a un.

Comezou ben o Celta, chegando con facilidade á área andaluza e mesmo tendo oportunidades nas botas de Iago Aspas.

Sen embargo, na primeira chegada do Sevilla á área galega, é Negredo, libre de marca, quen anotou a pracer o primeiro dos seus tres goles, cando trascurría o minuto 12. O Celta volvía amosar a súa debilidade na liña defensiva: tiro de Navas que rexeita ben Varas, pero recolle Negredo quen fusila libre de marca, pese a ter tres xogadores do Celta que non foron quen de opoñerse ó remate do xogador sevillano.

Pese a este primeiro mazazo, o Celta seguiu chegando á portería de Beto, con outra oportunidade de Aspas, que rexeita o cancerbeiro do Sevilla no minuto 22.

E pese ó dominio do Celta, chegaría o segundo do Sevilla, outra vez de Negredo, nunha xogada que foi un calco do primeiro gol sevillano. Corría o minuto 29. O marcador non reflexaba a superioridade céltica, pero sí a efectividade dos andaluces. Duro correctivo para os vigueses.

Hai que salientar que pese a desvantaxe dos vigueses, estes seguiron dando a cara, dominando o xogo e chegando con certa facilidade. Este dominio tivo como premio o gol dos vigueses, obra de Augusto Fernández, no 39, a pase de Iago Aspas.

Así se chegaría o descanso con vantaxe pola mínima e coa sensación que, a pouco que presionara o Celta, podía levar un bo resultado do Sánchez Pizjuán. Con permiso da defensa que, a todas luces, é a liña mais vulnerable dos galegos.

Comezou o Sevilla dominando os primeiros compases da reanudación, pero ós poucos minutos o Celta volveu recuperar o dominio do balón e as chegadas á área rival con claridade. Aspas e Augusto, teñen oportunidades claras nestos primeiros minutos do segundo tempo.

Sen embargo, volveu golpear o Sevilla. Medel tirou desde lonxe nunha xogada na que Varas quizáis poido facer máis. Corría o minuto 67 e xa, agora sí, se descompuxo o Celta pois, dous minutos despois, Negredo fixo o cuarto para os sevillanos. Outra vez fallo da defensa e o rexeite o recolleu Negredo quen firmou un "hat trick".

De aquí o final o partido convertiuse nun recital dos sevillanos que aínda poideron aumentar a conta. Navas, auténtico pesadelo dos celestes, perdonou hasta en dúas ocasións.

Así, se chegou ó final do encontra cunha dura derrota para os vigueses, quenes non aproveitaron a oportunidade de sair dos postos de descenso, trala derrota do Zaragoza o venres fronte ó Xetafe. Agora toca esperar ó Real Madrid e afronar o "tourmalet", na que os vigueses se enfrontarán ós madrileños, ó Deportivo e ó FC Barcelona.

Ficha do Partido:


4 - Sevilla: Beto; Coke, Fazio, Fernando Navarro, Alberto Moreno; Medel, Kondogbia (Maduro, 75'), Rakitic; Navas, Manu del Moral (Reyes, 46') e Negredo (Babá, 83').

1 - Celta: Javi Varas; Jonny, Cabral, Demidov, Bellvís (Roberto Lago, 80´); Oubiña, Álex López; Augusto Fernández (De Lucas, 74'), Mario Bermejo, Orellana (Pranjic, 59'); e Iago Aspas.

Goles: 1-0: Negredo (11'); 2-0 Negredo (28'); 2-1: Augusto Fernández (39'); 3-1: Medel (65'); 4-1: Negredo (67')

Árbitro: Del Cerro Grande (comité madrileño). Correcto na súa actuación, non influíu no resultado. Mostrou tarxeta amarela a Rakitic, do Sevilla, e a Jonny, por parte do Celta.

Incidencias: Partido correspondente á xornada 26ª da Liga BBVA disputado na noite do luns no Estadio Ramón Sánchez Pizjuán de Sevilla, cunha frouxa entrada, 27.000 espectadores. Partido transmitido en aberto por Marca TV. Varas foi recibido con aplausos por parte do público presente no Sánchez Pizjuán.

domingo, 24 de febrero de 2013

Celta 2 - 1 Granada (A Crónica)

Resino dalle indicacións ós xogadores | Foto: Tomás Rodríguez
Importante victoria a que conseguiu hoxe o Celta fronte a un bo Granada, ó que lle venceu por dous goles a un esta tarde no Estadio Municipal de Balaídos, nunha fría, pero agradable tarde para a práctica do fútbol.

Con esta victoria cumpriuse novamente a máxima de "adestrador novo, victoria segura". Os siareiros do vello campo do Val do Fragoso nun deixaron de acordarse de Paco Herrera, e faron varias as pancartas que se viron dándolle as grazas ó ex adestrador do Celta.

No puramente deportivo, comezou ben o Celta ó que Abel Resino lle imprimiu o seu carácter, cun equipo que xogou presionando ós rivais e cunha defensa máis adiantada, pero que por fases pecou dos mesmos erros que xa tiña, coma no gol do empate. Non foron trocos dramáticos, pois a base do equipo era a mesma coa que xogaba Herrera.

Comezou ben o Celta, chegando á área do Granada con claridade, aínda que co paso dos minutos os andaluces foron posicionandose ben no terreo de xogo. No minuto 21, Augusto Fernández tirou a porta, rexeitando con gran acerto o meta Toño. O rechace o recolleu Aspas, que fusilou ó meta nazarí. Pouco lle durou a ledicia ós celestes, pois dous minutos despois, Ighalo fusilou a Varas en tiro de volea, tras un despiste defensivo do Celta.

Táboas no electrónico de Balaídos no descanso. E na reanudación, o Celta saiu cun xogo máis desordenado, cousa que aproveitou o Granada que chegaba á meta de Varas con máis claridade. A mais clara, un tiro ó traveseiro de Ighalo nos primeiros minutos da reanudación. Resino decidiu poñer no terreo de xogo a xente coa veteranía de De Lucas e Mario Bermejo, ademáis de aproveitar ó dianteiro cántabro nas xogadas por alto.

Festexando o segundo gol | T.R.
Saiulle ben a aposta ó técnico toledano, pois Bermejo anotaría o segundo para o Celta e, á postre, o gol da victoria. Centro á area granadina, que deixou de cabeza Aspas, para que Bermejo rematase en semifallo. Corría o minuto 80. O Granada non se achicou nos derradeiros minutos, buscando incesamente o gol que puxera novamente ás taboas no marcador, aínda que o Celta tamén buscou un gol que lle dera vantaxe no marcador particular entre andaluces e galegos. Ó final, dous a un, e victoria importantísima pola inxección de moral ós pupilos de Resino, tendo en conta, ademáis, os marcadores favorables ós intereses celtistas do resto de equipos implicados nos postos baixos de táboa clasificatoria.

Ficha do partido:

2-R.C.Celta: Javi Varas, Jonny, Cabral, Demidov (Jonathan Vila, min. 73), Roberto Lago, Borja Oubiña, Álex López, Augusto, Orellana (Mario Bermejo, min. 59) Krohn-Dehli (De Lucas, min. 63) e Iago Aspas.

1-Granada C.F.: Toño, Nyom (El Arabi, min.86), Mainz, Recio, Siqueira, Mikel Rico (Brahimi, min.83), Íñigo López, Nolito, Torje (Buonanotte, min.72), Aranda e Ighalo.

Goles: 1-0, min. 24: Iago Aspas; 1-1, min. 27: Ighalo; 2-1, min. 80: Mario Bermejo.

Árbitro: Muñiz Fernández, do comité asturiano. Amonestou a Orellana, Jonny, Demidov (polo Celta) e a  Recio, Nyom e Aranda (polo Granada).

Incidencias: Partido correspondente á xornada 25ª da Liga BBVA, disputado no Estadio de Balaídos, diante de 18.418 espectadores. No descanso do partido leuse un manifesto co gallo do 150 aniversario da publicación de 'Cantares Gallegos', de Rosalía de Castro.

sábado, 9 de febrero de 2013

Celta 0 - 1 Valencia (A Crónica)

Orellana nun lance do partido | Foto: RC Celta
Xusta victoria do Valencia este serán en Balaídos fronte a un Celta que hoxe recuperou a esencia do seu xogo, pero non foi suficiente fronte a un Valencia que demostrou de sobra o por qué da súa clasificación en Liga.

Comezou máis forte o Valencia. Pero unha vez se meteu o Celta no partido, pasada a media hora de xogo, o xogo e as oportunidades eran dos vigueses, quenes tiveron a máis clara ocasión en mans de Aspas, que desviou Guaita a corner.

Pero non daban sensación de perigo os de Herrera e sí os de Valverde, quenes ó fío do descanso poideron marchar con vantaxe no marcador, cun remate de Rami que se estrelou no pau de Varas.

O comezo do segundo tempo, xogada para a polémica. Centro na área do Celta que remata de cabeza Roberto Soldado ás redes de Javi Varas, gol anulado polo xuiz de liña. Soldado estaba en liña coa defensa céltica.

O partido entrou nunha fase tola de toma e daca na que os valencianistas daban máis sensación de perigo, con dúas grandes intervencións de Varas, a remate de Jonas e Feghouli. Entraban as presas nos pupilos de Paco Herrera quenes xogaban mais co corazón que coa cabeza.

E cando se daba por bo o empate, centro de Joao Pereira ó segundo pau no que se adiantou Valdez á defensa viguesa e rematou a pracer. Era o minuto 93 de partido. Gol e final en Balaídos cunha nova derrota do Celta.

Debutou Orellana e quen obviamente lle falta integración no xogo do equipo, pero deu mostras da súa grande calidade. Quinta amarela para Oubiña, e o capitán non poderá estar a semán que ven en Xetafe.

FICHA DO PARTIDO:

0-R.C.Celta: Javi Varas, Jinny, Demidov, Túñez, Bellvís, Oubiña, Álex López (Pranjic, mjn.81), Kronh-Dehli, Orellana, Augusto (Mario Bermejo, min.50) e Iago Aspas (Park, min.84).

1-Valencia C.F.: Guaita, Barragán, Rami, R. Costa, Cissokho (Joao Pereira, min.37), Albelda (Dani Parejo, min.60), Banega, Tino Costa, Feghouli, Jonas (Valdez, min.88) e Soldado.

Goles: 0-1: min.93: Valdez

Árbitro: Teixeira Vitienes, do comité cántabro. Regular e mal asistido polas bandas. Amonestou a Oubiña e Iago Aspas (R.C. Celta); e a R. Costa, Tino Costa, Barragán e Feghouli (Valencia C.F.)

Partido disputado no Estadio Municipal de Balaídos, diante de 18.710 siareiros, según datos do clube vigués, en tarde fría, pero perefecta para a práctica do fútbol.

sábado, 2 de febrero de 2013

Osasuna 1 - 0 Celta (A Crónica)

Mario Bermejo no encontro de hoxe | EFE, vía Diario de Navarra
Mal partido dos de Herrera, que non souberon aproveitar as súas oportunidades e ó final pagouno caro fronte a un rival directo pola permanencia.

Comezou ben o Celta, que aínda que se atopaba por debaixo do Osasuna en tempo de posesión do coiro, parecía chegar máis claramente á meta defendida por Andrés Fernández. Ós seis minutos de partido, Iago Aspas non chegou por pouco a un balón que chapou ben o cancerbeiro navarro na frontal da área.

No minuto 23, sería Borja Oubiña quen marrou rematando fora outra clara ocasión.

Foron pasando os minutos e os celestes foron diluíndose, comenzando a chegar con máis claridade e perigo os vermellóns, que non se adiantaron no marcador grazas as providenciais paradas de Javi Varas, hoxe o mellor dos olívicos. O borde do descanso foille anulado un gol a Rubén, por falta a Varas.

Trala reanudación, ós catro minutos, Aspas tirou desde fora da área, un balón que marchou por riba da meta de Osasuna.

Sería un espellismo, pois ós 9 minutos, tras unha xogada de ataque navarra, un balón repelido pola defensa céltica foi parar ós pés de Armenteros, na frontal da área chica e libre de marca, quen fusilou a Varas.

Un a cero e Osasuna lonxe de repregarse, seguiu asediando a meta do Celta en busca do segundo. O Celta só reaccionou nos derradeiros 15 minutos de xogo, na que Álex López marrou unha clara ocasión a falta de 8 para o final, lanzando o balón alto.

Arbitrou Hernández Hernández, correcto, non influindo no resultado final do encontro. O cartón amarelo que lle mostrou a Roberto Lago no minuto 9, por derrubar a un contrario, conleva suspensión para o canteirán vigués.

Como única nota positiva do encontro, destaca o feito que no goal average particular entre vigueses e pamplonicas, este é favorable ó Celta pola victoria en Vigo por dous a cero.

FICHA TÉCNICA

1 - C.A. Osasuna: Andrés Fernández; Damiá, Rubén, Flaño, Nano; Cejudo (Silva, min.68), Lolo (Lou, min.88), Oier, Nino, Armenteros; Kike Sola (Llorente, min.65).

0 - R.C. Celta: Varas; Lago, Cabral (Toni, min.61), Túñez, Demidov; Jony, Oubiña, Pranjic, De Lucas (Park, min.61); Mario Bermejo y Aspas.

Gol: 1-0, Armenteros, min. 59.

Árbitro: Alejandro Hernández Hernández, do comité de Las Palmas. Mostrou cartóns amarelos a Roberto Lago (min. 9), Mario Bermejo (min. 32) e Toni (min. 82) polo Celta e Rubén González (min. 58) e Damiá (min. 84) polo Osasuna.

Partido correspondente á Xornada 22 da Liga BBVA disputado a tarde do sábado 2 no Estadio Reyno de Navarra de Pamplona, nun terreo de xogo en malas condicións para a práctica do fútbol.

domingo, 27 de enero de 2013

Celta 1 - 1 Real Sociedad (A Crónica)

Pranjic a piques de sacar un libre directo | Tomás Rodríguez
Táboas no taboleiro de Balaídos tralo tempo regulamentario no partido entre o Celta e a Real Sociedad, disputado esta tarde en Vigo. Un resultado malo para os intereses do conxunto vigués, pero meritorio si temos en conta as adversidades ás que se veu hoxe o conxunto vigués, comenzando pola nefasta arbitraxe do colexiado andaluz Paradas Romero, sen dúbida o triste protagonista do encontro de hoxe.

Comezaron os vigueses cunha proposta ofensiva coa inclusión no once inicial de Mario Bermejo, Park e Iago Aspas.

Esta proposta saiulle ben a Herrera no primeiro tempo. Os vigueses adiantáronse cunha gran xogada de Iago Aspas, que deixou para atrás para que Krohn-Delhi conectara un trallazo ó que nada poido facer o meta Bravo. Transcurría o minuto 32 do primeiro tempo.

Pronto comenzarían os contratempos para os olívicos. Nos últimos minutos da primeira parte, Aspas resentiuse das súas dores na espalda que fixeran que fose dúbida hasta hoxe mesmo. Quedou na caseta no descanso sendo sustituido por Álex López.

Trala reanudación, os vigueses pareceron querer durmir o partido, sendo nestes primeiros minutos de dominio claro dos donostiarras.

No minuto tres chegaría a xogada clave do partido. A Real Sociedad atacaba pola banda esquerda do seu ataque e o seu centro pegou na man de Augusto Fernández, que amosa ser involuntaria. Segunda amarela para o arxentino, castigo excesivo para os vigueses e o Celta veríase condenado a disputar toda a segunda parte cun home menos no campo.

Así as cousas, no minuto 14 chegaría o empate da Real Sociedad. Elustondo rematou de cabeza un saque de esquina (que no campo non pareceu existir) ó fondo da rede. Tras este gol, Herrera trocou a Mario Bermejo por Pranjic, que debutaba deste xeito co Celta, e a Park por Natxo Insa, quedando o Celta sen dianteiros no último tramo de partido. Tocaba defender o resultado a toda costa.

Pranjic deu boas sensacións no seu estreno e incluso tivo unha oportunidade a saque de falta na frontal da área, que se estrelou na barreira.

No tramo final de partido, Paradas Romero, auténtico protagonista esta tarde, amosou cartón amarelo a Park, que xa estaba no banco e vermella directa a Paco Herrera por formular observacións ó árbitro.

Así se chegou ó final do partido, cun empate que suma, pero semella pouco para a situación crítica que vive o Celta, que segue na parte baixa do taboleiro clasificatorio. Dentro de sete días, partido a vida e morte contra o Osasuna no Estadio do Sadar, no que o perdedor afundirase un pouco máis no pozo que leva á Segunda División.

FICHA TÉCNICA

1-R.C.Celta: Javi Varas, Jonny, Cabral, Demidov, Augusto, Borja Oubiña Krohn-Dehli, Mario Bermejo (Pranjic, min.55), Park (Natxo Insa, min.61) e Iago Aspas (Álex López, min.46).

1-R.Sociedad: Bravo, Carlos Martínez, Eliustondo, Íñigo, Markel, Xabi Prieto, Illara (Rubén Pardo, min.76), De La Bella, Chory Castro (Griezmann, min.69), Carlos Vela e Ifrán (Aguirretxe, min.60).

Goles: 1-0, min. 31: Krohn-Dehli; 1-.1, min. 59: Elustondo.

Árbitro: Paradas Romero, do comité andaluz. Expulsou a Herrera (min. 86) con vermella directa e a Augusto (min. 48) con doble cartón amarelo. Mostrou cartóns amarelos a Krohn-Dehli, Roberto Lago e Park, polo Celta, e a Elustondo, De la Bella e Markel, pola Real Sociedad.

Incidencias: Partido correspondente á xornada 21, disputado no Estadio de Balaídos, ante 18.136 espectadores. Antes do comienzo do partido se guardou un minuto de silencio en memoria do ex
xogador do Celta Monchito, recentemente falecido. Iago Aspas recibiu o II Premio Manuel de Castro como mellor xogador do ano 2012.

lunes, 21 de enero de 2013

Málaga 1 - 1 Celta (A crónica)

Iago Aspas nun lance do encontro | LOF
Táboas no encontro disputado na noite do sábado no Estadio da Rosaleda, un resultado que pode considerarse bo, por canto lle permite ó Celta seguir fora dos postos de descenso, pero que sabe a pouco tendo en conta o xogo despregado polos celestes (neste partido, coa segunda vestimenta), especialmente no segundo tempo, tralo gol do empate do Celta, no que tivo nas cordas ós malacitanos.

Adiantáronse os andaluces tras unha xogada embarullada na área do Celta, na que os galegos reclamaron fora de xogo, inexistente, e finalmente Demichelis leva o coiro ó fondo da rede para poñer o 1-0 no marcador. Parecía un castigo excesivo por canto o visto hasta entón por parte de ámbolos duos conxuntos.

Na segunda parte, o Celta saiu máis decidido polo empate. Este chegaría no minuto 30, cando tras un rexeite do meta Caballero, Augusto Fernández tirou por baixo para poñer o 1-1 no taboleiro. Aínda terían oportunidades os vigueses para levarse a victoria, especialmente nunha contra do Celta no que De Lucas quedou man a man co meta Caballero, no tempo de desconto, desbaratando o portero do Málaga coas mans. Tanto Willy Caballero como Javi Varas foron os auténticos protagonistas da segunda parte con intervencións decisivas que impediron que se movese o marcador.

Este empate deixa ó Celta no posto 17, con 19 puntos, a un do descenso.

A vindeira cita será no Municipal de Balaídos o sábado 26 ás 16 horas fronte a Real Sociedad. En Preferencia Celeste faremos a previa desde as 15 horas na nosa sede social, Cafetería Las Gradas (Avda. Fragoso, 92, fronte as Gradas de Tribuna e Preferencia) desde onde partiremos ó Estadio. Estades todos convidados.

E como sempre, o de sempre, Ala Celta!


FICHA TÉCNICA 

1-Málaga C.F.: Caballero, Sergio Sánchez, Welligton, Demichelis, Monreal, Isco (Duda, min.80), Toulalan, Iturra, Buonanotte (Portillo, min.66), Joaquín e Santa Cruz (Saviola, min.59)

1-R.C. Celta: Javi Varas, Jonny, Cabral, Demidov, Roberto Lago, Oubiña, Natxo Insa (De Lucas, min.58), Krohn-Dehli, Álex López (Mario Bermejo, min.81), Augusto e Iago Aspas (Bellvís, min.87)

Goles: 1-0, min.36; De Michelis; 1-1, min.75: Augusto

Árbitro: Estrada Fernández, do comité catalán. Amonestou a Buonanotte e Demichelis, polo Málaga, e a Javi Varas, Iago Aspas, Roberto Lago e Bellvís, polo Celta.

Incidencias: Partido disputado a noite do sábado 19 no Estadio La Rosaleda, diante de 20.304 espectadores. Terreo de xogo blando que dificultou a práctica de fútbol para ámbolos duos conxuntos. Antes do incio, gardouse un minuto de silencio polo pasamento de Antonio Pérez-Gascón, expresidente do Málaga CF.